يا فرحه العرب بضرب بوش بالجزمه ويبقى العرب همج

فرحه غريبه أوى عمت كل الشعوب العربيه من اللى عمله الصحفى منظر الزيدى

بس مش عارف ليه بعد مافرحت جدا إن بوش إتهان فعلا والمزايدون قالوا سعر حذاء

منظر مش عارف كم ألف دولار

بالذمه مش حاجه غريبه فعلا من كذا ناحيه

أولا كده كون حذاء إترمى على بوش ده يبقى يقلل من قيمته مش يرفعها ( الحذاء )

كونه إترمى على الشخص ده

الحاجه التانيه بقى ليه ماشفناش المزاد ده كده أعلن إنه فيه مجموعه من رجال

الأعمال العرب والفضائيات بيتزايدوا إنهم يهبوا مساعدات لأهل غزه المحاصرين

ولا لأهل العراق اللى إتشردوت ولادهم وضاعت بنات العراق فى الدول العربيه لمصير

يخزى كل عربى قد كده فلوسنا كتير علشان جزمه ومش معانا ولا مليم لفقير واحد

عربيهههه عربيهههه عربيهههه

ثم تعالوا هنا هو اللى عمله منظر ده كان ليه علشان إحتلال العراق ومساعده إسرائيل

بصراحه أنا لو مكان بوش هاعمل أكتر من كده لأن دى عقيدته ودى ديانته

عقيدته القتل وديانته سفك الدماء وعبادته إذلال الشعوب هو كده صح لشعبه

لأنه مش مننا ولا يعرفنا ولا عايش بينا ولا حتى بيتكلم لغتنا

اللى مش قادر أفهمه بقى

ليه اللى بيتكلم بلغتى وعايش معايا بلاش دى أنا اللى عايش معاه فى دوله واحده

وجيرانه كلهم على ديانته ولغته ولسانه ويعتبروا أهله

ليه هو أصلا سمح إنى أنا أنضرب وأتهان وأجوع وأتشرد وأختى يغتصبوها الكلاب

يعنى أخويا فى الدم واللغه شارك فى قتلى وسمح بده يحصل

وعبرت مقاتلاتهم من خلالى وضربت طائراته من مطاراتى وجنوده عايشين عندى

يبقى الجزمه اللى عليت مكانتها أوى دى مش من حق بوش دى من حق

بشر تانيه خالص هما اللى يستحقوا الضرب بيها مش يتحدفوا بيها بس

وقبل ما حد يفكر إنى بتكلم عن زعيم من زعمائنا الأشاوس المغاوير بقولكم لاء

حتى دول ما يستحقوا الضرب بالجزمه

اللى فعلا يستحق الضرب ده للأسف هو .................... إحنــــــــــــــــــــــــــــا

أه إحنا إحنا اللى سمحنالهم يعملوا فينا كده إحنا اللى عملنا الفراعنه

والطواغيت هما ما لهم ذنب لقوا شعوب كل همها الأكل والشرب والستات وبس

وكل اللى بيقدر الشعب يعمله أيام الإنتفاضه طلعنا نجعجع شويه ونهتف ونقول

وعاوزين نروح نحارب وعاوزين مش عارف إيه يا أخى إتنيل إنت وهو هاتروح فين

إنت أصلا ليك قيمه فى وطنك لما اللى بره هايعملولك قيمه

وييجوا يقولولنا يلا الجمعه الجايه مظاهره فى طنطا إركب قطر الساعه كم وإمشى منين

وإعمل مش عارف إيه وقول إيه تحس إنك خلاص بتخطط للى هاننهى بيه مهازل

ونروح نهتف ونقول وننشد ونعيط والستات بتوعنا معانا ماهما لازم يشاركوا بالجهاد

وبعدين............. هههههه ولا حاجه وإحنا مروحين نشوف مطعم كويس ناكل فيه

فول وطعميه ونروح بيوتنا ندخل عليهم تقولش الأبطال اللى فتحوا غزه وعكا وتلاقى

ياعينى اللى مجاش كأنه تخلف عن الزحف ومأواه جهنم وبئس المصير

يا سلام علينا شعوب زى العسل قمرات

أقول لكم ياعرب إحتفظوا بأحذيتكم بلاش نعمل كده تانى لأن ممكن ييجى اليوم

اللى أسيادنا اللى عملناهم بإيدنا ساده يحكموا علينا نمشى حافيين

وده مش مستبعد والله إنت لما تكون سايق قطيع من الغنم يبقى لو عاوزه يعمل البدع

إنت حر ده ملكك وإحنا ولله الحمد بقينا أقل فى الدنيا من قطعان الغنم

عالأقل قطيع الغنم بيستخدم قرونه يدافع بيها عن نفسه وشرفه

ولسه ما شفناش خروف عربى طلعله قرون يقول حرام كفايه إبعدوا عن بناتنا

عن أطفالنا عن أبائنا لسه ما طلعش حتى خروف

يبقى بالله عليكم خلوا أحذيتكم بأرجلكم أكرملكم كده الغرب ما عاد له حجه

هو ده العربى اللى عاوز يحكم العالم ده واحد بيتكلم باللى فى رجله لأنه مش عارف

يقنع اللى قدامه بطريقه متحضره إسمها الكلام ويبقى العرب همجيين