العروبة للشاعر محمود الجمال

العروبه
نفسى مرة حد يشرح هى ايه معنى العروبه
العروبه كلمه عرجا كلمه نفهمها بصعوبه
العروبه شعار مزيف ما لها معنى فــ القاموس
بس كانو يعلموها فــ الكتب او فــ الدروس
لما كنا صغيرين كنا نقرأها فــ كتاب
اوبنسمعها فى لحن من غنا عبد الوهاب
عمى ناصر كان حافظها كان فى باله فكره تانيه
كان يقول العرب قلب نبضه يتوحد فـــ ثانيه
كان بيحلم ويا نفسه ان حلم العرب واحد
جيشنا واحد مالنا واحد حتى دينا برده واحد
كان يقول ان الحدود شىء مزيف مش أصيل
وان دار العرب دارى مــ الرباط حتى الخليل
والسودان برده تبعنا وان نهر النيل بتاعنا
وان جرح العرب واحد حتى اوجاعهم وجعنا
لكن الايام قالت لى ان دى احلام هبيله
وان نار الفرقه هايجه حتى بين اهل القبيله
ما فى حد يحب اخوه او بيتمنى له خير
كلنا بننهش فى بعض زى مخلب اى طير
الغنى بيسرق فقير والحرام يصبح حلال
والقوى بياكل الضعيف حاجه اصعب مـــ الخيال
كلنا بنسبق نفوسنا نفسنا نرضى التتار
لوبروحنا لو بدينا حتى لو يلحقنا عار
من ديارنا بيضربونا واحنا نديهم سلاحنا
وان صرخنا بصوت ضعيف جيشنا بيدمر كفاحنا
لما يطعنى اخويا تبقى دى نسميها ايه
واما اكون عريان وهو الحرير يمشى عليه
واما انام والجوع غالبنى وهو سهران فــ البارات
او يكون عايش فى قصر واحنا ضايعين فـــ الحارات
بعد كل الهم دا لسه هتقولى العروبه
دى العروبه شعار مزيف كلمه نفهمها بصعوبه