انـــــــــــــــــواع الاطفال

نحلل شخصياتهم و نعلمك كيف تتعامل معهم و نصنفك أي واحد كنت منهم!
الأطفال .. أكثر كلمة تحمل معنى البراءة في العالم
لكن هذاك أول .. ألحين مع جيل ماكدونالدز
هاذي الكلمة تعني المعاناة و المقاساة
المراهقة أخبرها من 13 إلى 19
لا الحين المراهقة من 4 إلى 25
يعني ذا البزر يبي يقعد على طبعه من يوم يبدا يتكلم
ألين تزوجونه .. والله حالة من جد

المهم .. نبدا في التصنيف إلي توصلت له
و إلي عنده شي لا يبخل علينا
لأن هذا بحث رسمي .. راح يترتب عليه دراسات كثيرة ( أقول لا يكثر )
.
.
.
============================

1) - الطفل البريء ( المخفة ) :

هذا في البيت معاك عال العال
لكن تعال شوفه في المدرسة ولا مع أخوانه
مسكين كل يوم يدبجه واحد و يتوطى فيه إلي يسوى و إلي ما يسوى
و كثيراً ما يعاني هذا الصنف من التشوهات المزمنة
لأنه ما يدافع عن نفسه
و ننصح بإنك تدخله دورة كاراتيه ولا مصارعة ولا إلي متوفر

(2) - الطفل العنيد :

هذا النوع راسه ياااااااااااااااابس
و لو قلت له " آآآح حار " بيروح يلمسه عناداً فيك
لكن صدق أو لا تصدق هذا أسهل صنف ممكن تتعامل معاه
كل ما بغيت منه شي قول العكس
لا تصلي
لا تتشيطن
لا تاكل
و هو راح يستجيب لها بالعكس و يبي يسوي إلي في راسك
لكن هو يشكل مشكلة لو كان له أخوان في نفس العمر أو قريب منه
لأن راح يحصل تضارب في فيوزاتهم و بعدها يتحول طفلك إلي بزر متبلد المشاعر و يصير ما يستجيب لك ولا لغيرك ولا لنفسه
و هاذي حالة مهم تتفاداها

(3) _ الطفل المادي $$$ :

هذا واحد ما تقدر تتعامل معاه إلا و إنت عندك شي
يا حلاو يا علك يا رضاعة
و مشكلته ممكن توصل فيه لدرجة ما يروح الحمام ( الله يكرمكم )
إلا و إنت معطيه 5 ريال
و هذا بيعاني لمن يدخل المدرسة .. لأنه بيتوقع فلوس و حلاو من مدرسينه
و تكبر المشكلة لمن هو يكبر .. لأن لمن يبي يكبر يبي يطلب أشياء أغلى
و هذا النوع بيفلس بك
و الأردى من كذا لو كان ( فتـّان )
بيسوي لك مشكلة مع الوالد و الوالدة
لو شافك تعاكس بيقول (( بعلم أمي عليك ))
ولا لو سرقت السيارة بيقول (( و قسم بخلي أبوي يكفخك ))
و تصير باستمرار تعطيه و تعطيه
فـ حاول دااااايماً تفقده الوعي عن طريق الضرب المبرح ( ياشيخ الأسلوب )
عشان ينسى إلي صار بعد ما يرجع له وعيه

(4) -الطفل المستقوي :

هذا وخرررررررر عنه
بس جاهز كفوف و بكسات و ترفيس
بيسوي لك أنواااااع المشاكل مع مدرسته
و آخرتها لمن يكبر ما راح يدخل جامعة
بيروح يشتغل ( بودي قارد ) في شركه



(5) - الطفل الدلوووووع :

يووووووه ذا مأسااااااة
تلقى كل الناس يسمونه " دلوع ماما "
لدرجة ممكن أمه تخيط ملابسها في ملابسه من كثر ما هو لاصق فيها
لو جت تبي تروح عرس راح معها .. لو عندها مشوار نشب فيها
هذا يبدا يسبب مشكلة لمن يصير عمره فوق الـ 15
لأن بيطلع شكله غلط و هو قاعد في حضن أمه
و مشكلته .. أسلوبه بالصياح
تلقاه 24 ساعة صياااااااح و إزعاااااااااج و قللللللق
على أسباب تافهة
و هذا ينصح في حالته إنك تخيط فمه لأنه يبي يسوي لك أزمة


(6)- الطفل ( البثر ) :

هذا عشانه اخترعوا المثل ( الاطفال ما ينعطون وجه )
يجيك يقولك
=ليه النملة ما تطير ؟
-- لأن ما عندها أجنحة !!
= طيب ليه ؟
-- لأنها مو من الحشرات الطائرة
= طيب ليه ؟
-- لأنها حشرة أرضية
= طيب ليه ؟
-- لاحوووووووووول خلاص انطم
= طيب ليه ؟
--
هذا الحل الوحيد إنك تشتري خيزرانة ولا عجرا عشان تدبجه و تصفقه كلما مصخها ..خله يعرف إن الله حق
أو لو كنت إنسان ما تتعامل بالطق .. فاشتر له كتب
و كلما سألك شي قل له : رح اقرا عن الموضوع
و مع الوقت بيصير ما يسال .. لأنه متعيجز يقرا


(7) -الطفل الداج :

هذا لا عمرك تشيل عينك عنه
هذا نووووع حالته مستعصية مالها حل !!
لو سرحت عنه دقيقة .. تلقاه فتح الباب و طلع
ما عنده وقت
هذا لا تشتري له سيارة ألين يصير عمره 35 يمكن يكون عقل ذاك الوقت
و تراه بيفلح في الرياضيات و الهندسة
و ممكن يشتغل في تصليح الطرق
لأنه يبي يمتر الشوارع تمتير من كثر ما يدوج فيها
و هذا يشكل أكبر نسبة من البزران المذكرين في أيامنا هاذي


( - الطفل الطموح "بالعكس" :

هذا البزر الطييعي لمن تساله : وش تبي تصير يا شاطر لا كبرت
بيقولك : أبي أصير دكتور
كيف تعرف لو كان طموح " بالعكس "
بيرد عليك بأجوبة مثل : ما راح أصير شي بتزوج وحدة شقرا تصرف علي .. ولا أبصير حرامي أسرق بنوك .. ولا أبصير مجرم أقتل الناس
هذا ما تقدر تسوي له شي أبداً أبداً
بس لو بغيت تخدم المجتمع روح بلّغ عنه الشرطة
عشان يصيرون وراه وراه


(9) -الطفل الملسون :

يوووو ذا دايماً ارسله مع خواتك لا طلعوا من البيت و خايف عليهم
هذا ممكن يسكت رجّال لو بغى
ملسووووون وعليه ادب بشكل
و معظم المرات هذا النوع ينتج في البيت إلي مليان بنات
لأنه راح يقتبس هالصفة منهم
و تقول الدراسات إن 77% من هذا الصنف بزرات مو بزران ( يعني بنات )
طبعاً من وقت لوقت حارشه .. عشان تشوف وش تعلم كلمات جديدة
و لو لقيت وحدة وصخة و مالها داعي عطه بكس و نضمن لك ما عاد يستخدمها
بس نذكرك إنه لو جا عمه ولا جده قال تعال سلّم
لا تستغرب لو قالهم أشياء مثل : (أشتغل عندك انا) ولا (إنت إلي تعال ) ولا حتى ( يا حمار كلمني زين )
يعني وقح وقح وقح .. بس يصلح حق هوشات



(10)- الطفل أبو رادرارات :

هذا أللللللللللعن نوع
هذا لا عمرك تتكلم أو تسوي تصرف قدامه
هذا لو قعد مع أحد
فـضّح في كل أسرار البيت
ممكن تتطور حالته إلي التجسس
و صدقني ألعن شي إنها توصل للتجسس على مكالمات أخته مع صديقاتها
لأن هذا يبي يوّلد مشاااااكل مالها نهاية
فأحسن شي إنك يا تقص لسانه
يا إما تحبسه في غرفة الشغالة ألين ما يعقل
و يقال إنه يتعدى هاذي المرحلة بعد سن البلوغ .. فإن شاء الله له حل
لكن إياااااااااك تطنش الوضع
لأنه يتطور للقافة .. حتى بيصير يسأل عن كل شي
كل شي : مين ؟ وين ؟ متى ؟ مع من ؟ من قال ؟
و لمن يصير عندك ضيف
يجي يطب عليكم فجأة و يقول وش تسوون
أبي أسوي إلي تسوونه
و لو كان بنت فعليها السلاااااااااام
لأنها بتطلع ( أم هلال ) يعني وكالة أنباء متنقلة و تنفع تشتغل للجزيرة ولا السي ان ان


(11) - الطفل اللزقه:

هذا سمي العلكة كناية عن التلزق
هذا يستجيب لمؤثرات عديدة
منها : الغترة و الشماغ - العباية - المفتاح - النعال و الجزم
لأنه مجرد ما يحس إن أحد في البيت بيطلع على طول يلبس نعاله و يركب في السيارة
حتى لو ضيوف و جوا بيطلعون من بيتكم .. لا تستغرب لو راح معاهم
هذا لازم في حالته تشتري باتكس و سلاسل حديد
لأنك بتحتاج تلزقه في كرسي ولا شي
حتى داااااايماً قبل ما تطلع من البيت طالع في رجولك يمكن يكون ناشب عليها
و هذا داااااايماً يكون فيه علامة مميزة مثل دعسة رجول تحوس وجهه